Kum 1989 kum a, Armenia a Lirnghing rapthlak tak ritcher scale 8.2 lai maia nghing kha kan la hre theuh awm e. minute 4 lek chhungin mi 30,000(singthum) teh meuhvin nunna an chan ta a nih kha. Chutia mi an phili buai nuai nuai karah chuan, Pa pakhat hian, a in chhuahsanin chumi ni zing lama a fapa a va dahna Sikul chu ava pan vat a; mahse, ava thlen meuh chuan, an Sikul building chim sawp nulh mai bak chu engmah dang ava hmu ta biklo a ni. Chupa chuan, a fapa hnena athil lo sawi thin; “Eng thil pawh lo thleng sela, puih I ngaih hunah chuan, tanpui tur chein I kiangah ka awm zel ang” tia alo tiam tawh kha a hrechhuak ta uai uai mai a, hrehawm a tiin, a mittui chu danzawh rual lohvin a far ta zawih zawih mai a ni.

Tukin zinga a fapa a thlah laia an Sikul building chu a mithlaah alo lang leh uai uai a, an classroom zawn awm chu a han ngaihtuah leh a, chulaia inchim intiangkhawm nulh mai chu a en vang vang a, eng dang ngaihtuah tawh lovin, a theih ang ang chuan, a fapate classroom zawn a, inchim sawp nulh mai chu a theih ang angin a thianfai tan ta a. A thiltih an han hmuh chuan, a bul vela Paho lo awmte chuan, “ti ti duh teh suh, I hahthlawn mai mai ang” an lo ti a. Ani erawh chuan, engdanga chhang talo chuan, “Min pui ve zawk ta che u” tiin alo chhang mai thin a, a hna chu ngawrh takin a thawk mial mial mai a ni.

Kangthelhtu pawl hotupa pawh chuan, “I thiltih hi a hlauhawm lutuk, keimahniin thil tul chu kan lo tifel mai ang” tih pahin han pawhsawn mai hi a han tum a, mahse, chu Armenian pa chuan, a ngaite bawkin, “Ka Fapa hi min zawnchhuah pui dawn a mi?” tih pahin, a hna chu ngawrh takin a thawhsan hmiah hmiah mai a. Chutiang zelin, Police lam hotupa berin khap ahan tum pawh chuan, angaite bawkin a chhang a, a hna chu ngawrh lehzualin a thawk sauh sauh mai a, “Ka fapa hi a thi nge a dam tih ka chian hma chuan ka chawl dawn lo” a ti bur mai si a, tihbuai tinah pawh an tin ta lova, an tha en ta mai mai zawk a.

Chutianga chawl hauh lova darkar 38(sawmthum leh pariat) zet ngawrh taka a thawh hnu chuan, Cement tlang lian tak pakhat a han phawh leh chuan, a fapa aw niawm tak chu a hre ta tlat mai a. “Armond, Armond, khawiahnge I awm? Ka aw chu I hre thei em?” tiin a au ta tuar tuar mai a ni. Chutah le, thilmak alo thleng ta!, Armonda aw ngei mai chuan, “Ka Pa, I aw ka hria e, keimah I fapa Armonda ngei kha kani e. Ka thianteho hi an thlaphang lutuk a, ka hnem tang tang a, ‘Ka Pa kha he Lirnghingah hian thi lova a damchhuak anih phawt chuan, min rawn zawngchhuakin min rawn chhanchhuak ngei ngei ang, “Engthil pawh lo thleng sela, tanpui I ngaih hunah chuan, tanpui tur chein I kiangah ka awm zel ang” tiin min tiam tlat a ni†tiin ka lo fuih tang tang hlawm a, hei ka sawi ang ngeiin tunah I aw kan hre ta ngei a, kan lawmin, kan thla a muang ngei mai”, tiin a rawn chhang ta a ni.

“Engtinnge in awm mek?” tiin a han zawt leh a, Armonda chuan, “Ka pa, kan vain mi 14(sawm leh pali) kanni a, kan thla a phangin kan ril a tam em em tawh a, kan tuiin pawh a hal tawh tak zet mai. Kan Sikul a han chim rup khan, kan classroom chim kha a bang pahnih kha a chunglamah an indokhalh a, kan awmna lengtawk vel hmunawl leh him a awm phah ta a, hei, tunthleng hian kan la him phah ta a ni” a rawn ti ta lauh lauh mai a.

A pa chuan a fapa chu rawn chhuak nghal tura a han tih chuan, a fapa erawh chuan, “Ni love kapa, kei te chuan pa ka nei che a, eng ang dinhmunah pawh min chhanchhuak turin ka tan I inpeih reng dawn a, heng ka thiante hi lachhuak hmasa phawt rawh” a rawn ti leh ta tlat mai a.

Kangthelhpawl te, Policeho leh mipui lo awm vete chuan, an thil hmuh leh hriat chu awih har an tiin mak an ti kher mai le. Pa pakhat, a fapa achan tak avanga thluak buai ta ni ngeia an hriat chuan, naupang 13 zet mai chu, a mal malin a pawtchhuak ta hlawm a, a tawp berah chuan a fapa duh tak, a hmangaih em em Armonda ngei mai chu a pawtchhuak ta a, an inkuah vawng vawng mai an han hmuh chuan, an vela lo thlirtute chu, an hnuk a ulh teuh hlawm mai a, kut an beng ta dur dur mai a ni.

Ania sin, Hmangaihna dik tak (genuine love) hi mihringte tan hian hriatthiam phak tak tak hi a harin, sawifiah pawh ava awlai lo tak em. Pathianin min hmangaih dan hi hriatfiah leh sawifiah tak tak phak ava han har tak em. Amah Pathian ngei mai chu Hmangaihna hlawm Pathian, kan Pa chu ani miau si a. Hringfaten hmangaihna chhinchhiah tlak leh chungchuang tak kan han tih ve chang hian, Kan Pa Pathian hmangaihna hlimthla hi alo lang ve pha riai ruai thin a ni.
Hmangaihna dik tak chuan, a dawhthei a, ngil a nei bawk thin. A itsik lo va; a infak lo va, a uang lo va, a chemawilo lo va, mahni hma a sial lo va, a thinur duh lo va; fel lohnaah a lawm lo va, thutak erawh chu a lawmpui thin a; engkim a tuar hram hram a, engkim a ring a, engkim a beisei a, engkim a tuar chhuak thin a lo ni. (I Korinth 13:4-7).

Hmangaihna chuan mi a ti beidawngin a tithlawn ngai lo.
Hmangaihna tih loh hi chu tuma engmah hi bat tur pawh alo ni lo. Mahni kan inhmangaih ang hian kan vengte hi hmangaih vek thei teh ila aw…Pu Hnam Sakhuaa leh a pawlte beisei angin he lei hi Vanram tlafualah kan chantir ang a, Pathian ang main kan leng suau suau mai tur. Mahse…tunah zawng, darthlalanga inhmu riai ruai ang deuh chauh kan la ni rih si; a kimlovin kan hria a, a kimlovin thu kan la hril thin si anih hi. A famkim erawh ala thleng ngei dawn a, chutih hunah erawh chuan, a kimlo hi tihban a ni tawh ang a, a famkimin kan hre tawh dawn a ni. Aw, ava nuam dawn em, chu hun lo thlen hun tur chu.
Lalpan a thu malsawm rawh se. Amen.
Sunday hman nuam vek u le.

August thla chawhnu lam ani tawh a, boruak lum vawng daitu tura Pathianin Natural Air Conditioner min pek ruahtui pawh a hul tan ta a, Thitin thla leh Khuangchawi thla kan la chuangkai bawk si lova, boruak chu a lum uap churh mai a ni. Ka thiannu ha-nget hnawh tir kan tum a, mi an tam lutuk lo nain, pakhat khawih chhung pawh a rei duh hle mai. Waiting room-ah pawh chuan ka awm reng peih lova, bathlar, kawngpui bul maiah chuan ka thuchhuak ta zawk a.

Chutia tihtur a awmloh lutuk avanga hun khawhral nana Facebook leh misual.com ka luh chhawk chhen lai chuan, tlangval pakhat sam bal leh hreu bum mai, kawr ha lo, balh hmel em em mai hi ka bula kawngpuiah chuan a lokal ta a. Kekawrbul ang reng deuh chu a ha ve bawk a, mahse a elastic chu a rul tawh hle tih hi a hriat a, a thler hniar sung mai bawk a. A serh hmul te chu a lang vek a, a Sazu tak erawh chu, a lang bik chiah lo deuh a ni.

Ka rilruah cuan Matthai bung 25:36 thu, “Saruak ka nihin puan mi sin tir a” tih kha a rawn lang a, tanpui chakna a rawn lang thut a, mahse, ka chetchhuah hmain min kal pel hman tawh a, a hnunglamah phei chuan a kekawrbul hak ve khan hliah a lawi a lo nei tawh lo va, a mawngtam a pan awm luai mai pawh chu a lang chiang hle mai. Tanpui duhna thinlung ka pu viau na a, ka chet chhuah tak tak hmain akal liam hman ta a. Pathian thu bawk chuan min rawn deng leh a, “Thil tha tih tur hria a, ti si lo chu, a tan sual a ni” tih kha. Pathian lakah pawh chuan inthiam chiah lo deuh chungin, “Ka tanpui hman lo a lawm” tih rilru puin ka inthiam chawp deuh ta a ni.

Mahse, mak tak maiin, a rawn let leh ta kher a!. Chutah zet zawng, Pathian tirh a nih rinna ka nei ta tak tak a, ka va pan ta chawt mai a. “Hey” tiin ka han au ta ngawt a, a ding ve ta chut mai a, chutah ka va panhnai ta a, khawlaia mi dawr kawta thawmhnaw mantlawm te te an zawrhlai an khaite chu kawk pahin, “Saw laia thawmhnaw an khai saw lei sak I duh em? Kekawr tal chu ka lo leisak ang che chu” ka han ti ta rawih mai a. Ani chuan, fiah ang reng tak hian, “Aih thawmhnaw chu ka duh lo, cheng sawm min pe zawk mai rawh” a ti ta teh tlat a! Tichuan ka wallet ka han phawrh a, cheng sawmhnih chu ka pe ta a. A Lawm kher mai.

Ka ngaihtuah zui nasa ta mai a, a tlawmngai ve te pawh a ni thei a, engahnge kekawrbul tal kha chu ka lo lei sak luih loh le aw, Pathian hian engtin tak min ngai ang maw? Tiin ka rilru chu a hlim viau laiin, inthiam lohna ruk deuh chu ka nei ru ta tho a ni. Ka hma lak dan hi a tawkin a awm ve thoin in hria em? Engtin nge ti ila, tha ber awm a in hriat le? Min han hrilh teh u.

Hemi ni hi Second Saturday a ni a, Hostel naupang an nu leh pa ten an rawn hruaichhuak deuh vek a, mahse, hmun hla a mi 10 rual vel hi lachhuaktu nei lovin an cham bang thin a. Chtianga chambang an awm tawh chuan, kan fate hian, min theihnghilh thak deuhthaw hian an kawm ta thin a, an bulah chaw an ei a, zanah pawh an bulah an riak ve mai thin a ni. Hemi ni pawh hian, ka fapa te ber chuan, a kawm rual mipa naupang pahnih chu a lo zui nileng a.

Zanah chuan, nidang ang lo tak hian, inthlahrun hmel tak leh tim tak hian ka bulah a rawn tawlh hnai hrat hrat a, a tawpah chuan, heti hian a rawn tawngchhuak ta a. “Ka Pa, Vawiinah khan in awm loh hlan khan, Sikul Ceiling luhna awngah khan ka thiante pahnih nen kan lut a, Ceiling chungah khan kan kal kual a, I room chung Ceiling kha ka rap pawp palh ta hlauh mai a, khawngaih takin min ngaidam la, min hrem lo hram rawh aw” a ti ta reuh a.

Mak ka ti hle mai a, thinrim viau tur ka nih laiin, ka thin a ur ta mang hlek lo mai a, ka fapa, ka hmangaih em emin inthiamlo em em mai a, ka bula a thil tihsual a rawn puang a, ka ngaihdamna a rawn dil chu, ka ngaidam chiang kher mai. Ka ngaidam satliah mai pawh a ni lo va, min tihlim veng veng zawk a ni. A nu nen chuan, vawikhat mah Ceiling-ah chuan lawn tawh ngailo turin kan hrilh a, anmahni tan tlak palha thih emaw, a nih em loh pawhin piansual emaw a hlauhawm zia tha takin kan hrilh ta a.
Thawhtanni a ka han Office chu, ka office chung Ceilng pawp chu ka hmu ta ngei a, Ka fapa khan, inpuang lo khan lo zep ni ta se, an tam tham lo bawk a, ka dawp chhuak tho tho ang a, ka hrem hlawm ngei ang. Nimahsela, tlang taka an thiltihsual zep tlat lo va, ka laka inpuanga ka ngaihdam a rawn dil avang khan, ka ngaidam tawh a, ka thin pawh a ur hek lo a ni. Harsa lutuk lova thawm that theih a ni tho bawk a.

Mihring kan nih chhungin, Sualna ti tur leh Kan tisa chakna te Pathian duhloh zawnga hmang khawlo tur tea thlemin kan awm fo thin a ni. Thlemna hnehloh palha tluk palh chang te pawh a lo awm thinin, Kan Pa Pathian duhloh zawngte pawh kan tih chang a awm ngei ang. Pathian mithmuhah langlo tura thuhruk reng a awm si lo. Kan zep ruk ve tang tang a, sual tihna remchang dang melh reng leh, a tul chuan ti leh duh zel mai a kan awm ai chuan, inchhir leh Simna thinlung pu chung a, Kan Pa Pathian hnena kan sualte puanga thupha kan chawi chuan, min hmangaih em em reng tu kan Pa hian min va ngaidam nasa dawn em.

Kan Sualte thupha kan chawi chuan, kan sualte ngaidam tur leh, kan fel lohna zawng zawng tlengfai turin amah chu a rinawmin a fel a ni. (! Johana 1:9)

Sunday hman nuam u le.

Ni 4 chhûng khân ka nguai
Ni 4 chhûng khân ka hlim lo
Ni 4 chhûng khân ka bangbo
Ni 4 chhûng khân ka hawi hil
Ni 4 chhûng khân ka nui tam lo
Ni 4 chhûng khân ka khua a har
Ni 4 chhûng khân ka lung a lêng
Ni 4 chhûng khân tihtûr ka hre lo
Ni 4 chhûng khân khaw nge in awm?
Ni 4 chhûng khân min ngai ve viau em?
Ni 4 chhûng khân thian kawm tûr ka nei lo asin

Ni 5-naah erawh ka tha a tho ta!
Ni 5-naah erawh hlimin ka nui ta!
Ni 5-naah erawh ka harhvâng ta!
Ni 5-naah erawh ka lâwm a kim leh ta!
Ni 5-naah erawh thian kawm tûr ka nei ta!

Mi tam tak nghahhlelh em em chu zaninah kan hmu dawn ta e! Tun hmaa kum 100 lai lo indo tawh, France leh England inkhel hi a theuneu lovang, hmaih phal a ni lo. Ukraine hi an European Championship match hmasa ber tur ni mah se thlengtu ram an ni a, Sweden nen hian an inkhing tâwk viau ang.

Donetsk — Group D: France v England (09:30PM)
France team first eleven (ni tura ngaih): Lloris, Debuchy, Rami, Mexes, Evra, Cabaye, Diarra, Nasri, Malouda, Ribery, Benzema.
England team first eleven (ni tura ngaih): Hart, Johnson, Terry, Lescott, Cole, Milner, Gerrard, Parker, Downing, Young, Carroll.

* France team hi Les Bleus tih an ni a, an coach chu Laurent Blanc a ni; tunah hian FIFA ranking-ah 14-na an ni mek.
* France team European Championship-ah kum 1960-ah tel á¹­anin vawi 7 an telna a ni tawh a, kum 1984 leh kum 2000 khan an lo champion tawh a ni.
* France midfielder ropui ni ṭhin, tuna UEFA President ni ta Michael Platini hi European Championship-a hat-trick siam rang ber niin kum 1984-a Yugoslavia an hneh ṭum khan minute 18 chhûngin hat-trick a siam a ni.
* European Championship history-a goal luh hneh berna match-ah kum 1990 khan France hian Yugoslavia 5-4 in an hneh lo.
* England team hi Three Lions tih an ni a, an coach chu Roy Hodgson a ni; tunah hian FIFA ranking-ah 6-na an ni mek.
* England team hi European Championship-ah kum 1968-ah tel á¹­anin tun hi an vawi 8 telna tur a ni tawh a, an tel á¹­an kum khan 3-na niin an thlen san ber á¹­um a ni.
* Champions League final hnuhnung bera tel players 5 ngawt zaninah hmuh tur an awm ang.
* European Championship-a France leh England inhmachhawn hnuhnun ber chu kum 2004 June ni 23 kha niin France hian Zidane goal hnih hmangin 2-1 in an hneh.
* England leh France hi vawi 36 inhmachhawn tawhin England hian vawi 9 hnehna an chang a, vawi 4 inhnehtawkin vawi 23 chu France an chak thung.
* Zanina an inkhel hi N. Rizzoli‎ (Italy)-in a hâm ang.

Kiev — Group D: Ukraine v Sweden (12:15AM)
Ukraine team first eleven (ni tura ngaih): Pyatov, Husyev, Khacheridi, Mykhalik, Selin, Timoschchuk, Nazarenko, Konoplyanka, Yarmolenko, Devic, Voronin.
Sweden team first eleven (ni tura ngaih): Isaksson, Lustig, Melberg, Olsson, Granqvist, Elm, Svensson, Kallstrom, Larsson, Toivonen, Ibrahimovic.

* Ukraine hi European Championship-a an vawi khat telna tur a ni a, a thlengtu ram pahnih zinga pakhat niin Oleh Blokhin hi an coach a ni mek.
* Ukraine team hi The Yellow-Blues tih niin FIFA ranking-ah 52-na a ni mek.
* Ukraine boss Blokhin hian zanina an khelh tur Sweden hi kum 1982-a Soviet Union-a friendly match an khelh á¹­umin goal a lo thun tawh.
* Sweden hi The Blue-Yellow tih an ni thung a! FIFA ranking-ah 17-na a ni mek.
* An coach hi Erik Hamrén a ni.
* European Championship-ah hian kum 1992 khan tel á¹­anin Semifinal an thleng a, hei hi an thlen san ber a ni. Tun hi an vawi 5 telna tur a ni.
* Sweden leh Ukraine hi vawi hnih lo inhmachhawn tawhin Sweden hian vawi khat an hneh a, vawi khat an indraw thung.
* Zanin an inkhel hi C. Çakιr‎ (Turkey)-in a hâm ang.

The post Zanin football indona ropui en ang aw…! appeared first on Mi(sual).