June ni 7 Zirtawpni khan, Madhya Pradesh a Betul District a Hardu khuaah chuan, ‘Mukhyamantri Kanyadaan Yojna program hmanga Nupa tuak 400 zet inneihna buatsaih a ni a. Mahse, he inneih runpuiah hian thil pangai lo tak a thleng ta tlat mai a. Chu chu, Complaint a awm avangin, innei tur nula ho chu, an inneih hmain, an rai leh rai loh bakah, an virgin leh virgin loh an test hmasa a ni. Nula 8 lai chu an disqualified a ni awm e.
He thil thleng dangdai tak hi an hriatin, sawrkar lam pawh an che vat a, Collector Rajesh Mishra chuan Inquiry an lak tur thu a sawi a, Assistant Collector Neha Malviya chu Report kimchang thehlut thuai turin ruat anih thu a sawi.

Madhya Pradesh a Opposition Leader Ajay Singh chuan, “Chief Minister Shivraj Singh Chouhan hian Tribal ho hnenah ngaihdam a dil ngei tur a ni” a ti. Tin, Heng hmeichheho an test na hmun hi Damdawiin pawh ni lovin, Sawrkar Sikulah ualau takin an test niin an sawi.

He Mukhyamantri Kanyadaan Yojana hi a thil tum(Program) chu a tha phian a. Mirethei ve te te te, anmahni sum sen ngai lovin, Sawrkarin a huhovin Inneih runpui a buatsaih sak thin a, Nupa tuak tinte hi Rs.15,000/-(Singkhat sangnga) theuh an pe nghal bawk thin a ni.

Mizoramah hian tive ta ila, disqualified hi kan tam thei viau ang em?
Source: We The Nagas

Thuhma: Kum 2008 YMA Day kha mi(sual).com a ka post ( YMA Day leh Father’s Day ) hmasak ber ni a ni a. Kum hnih chhung teh meuh mai comment tu a hmu zo lo a, zam awm duh ve deuh chu a ni! Tichuan, 2010 October thla ah chhana‘n a comment a, khawngaih mark nen! Aug 2011 ah Asteric in a comment leh a. 2012 comment lut lehin kum tin comment a la lut ve ta ziah a. Vawi khat post na a ni bawk si a, a va han zahthlak tel deuh duh reuh tak em!

YMA (Young Mizo Association) kan tih hi Young Lushai Association tih hming pu in June ni 15, 1935 ah christian missionary te leh kristian hmasa mi thahnem ngai ten an din a ni a. An din chhan ber chu kristianna in kan ram a tuam hluai takah chuan Zawlbuk kai an tlem tial tial a. Governor meuh pawhin revive tum mahse a theih tak loh ah chuan kan missionary thenkhat te leh kohhran hruaitu ten Zawlbuk aiawh zo tur kawng dang an dap ta a.

Tichuan June ni 3, 1935 ah missionary Miss Katie Hughes (Pi Zaii) inah chuan committee koh a ni ta a. A hmingah “Young Mizo Kristian Association” tih chu rawtna awm mahse a huam kim lo a an hriat avangin Rev David Edward (Zoram Pa) rawtna “Young Lushai Association” tih chu pawm tlangin June ni 15, 1935 atanga bul tan turin an rel thlu ta a ni. India Independent a lo nih khan Zohnahthlak hrang hrang te a huam kim theih nan October ni 7, 1947 khan “Young Mizo Association” tih in thlak a ni.

Tu te nge member chu?
Mi tu pawh, Zohnahthlak tawh phawt kum 14 chin chunglam chu member ah an qualified a. Upat zawng erawh peih chen chen niin ri an kham lo. Member ni tur hian annual member turin cheng 2 leh cheng za pek a ngai a (Hei hi CYMA website a an ciah dan a nia ka chiang bik lo ~ VaiVa). Member tu pawh kum nga aia rei member ni tawh chuan an awmna branch kaltlangin Central Executive Committee (CEC) hnenah Life time membership a dil thei bawk a ni.

YMA hi all India organisation niin barnch hi Mizoram, Manipur, Assam, Nagaland, Meghalaya leh Tripura ah te din a ni a. Societies Registration Act (Act XXI of 1860) hnuaiah Registration No. SR4 of 1977 a ziah luh a ni.

Motto (Thil tum):
1. Hunawl hmanthat
2. Zofate hmasawnna ngaihtuah
3. Kristian nun dan tha ngaihsan … te an ni.

Thuneihna inkhaidiat dan: General Conference in thuneihna sang ber an nei a. A hnuaiah Central Co-ordination Committee (CCC) a awm leh a. Chumi hnuai leh ah chuan Central Executive Committee (CEC) a awm leh a ni. Hemi hnuai ah hian sub-hqrs (5), group (47), branch (722) leh section an awm leh bawk.

CYMA hian thlakip chhuak “YMA Chanchinbu” tih chu kum 1973 October atangin a chhuah bawk a. Kum 1983 atangin kum tin kum puan a nei thin a, kum puan hmasa ber chu “FAINA Kum” a ni.

Chawimawina a dawng nual tawh a. Chung te chu ~
1. Indira Priyadarshini Vrikshamitra Award, 1986 by the Govt.of India.
2. Excellence Service Award by the Govt.of Mizoram for the three consecutive years,1988-1990.
3. Indira Gandhi Paryavaran Puruskar, 1993 by the Govt.of India.

Source: www.centralyma.org.in

Ka Pa,

Mi pa-te angin lehkha zir sang lovin, hna zahawm thawk lo mah la; kan chhungkaw tana I thiam leh phak tawk hlan theihtawp I chhuah thin kha hriatsak vek lo che mah ila, kan tan hian i va’n hlu tak em!

Zirna I ngaisang…
Thiamna run bela I fate’n kawng kan zawh tan atangin kan zirlai chu ngaihpawimawh bera I neih thu hi kan zirtirtu pa ngeiin uar taka min hrilh kha dawt a niin ka hre ngailo. Pawl khat ka bawh kan kuma zirlai bu a thlawna ka dawn ve tak loh nia kan zirtirtupa’n, ‘Mahminga chu a pa’n a leisak leh mai ang’ a tih kha naupang kum 6 mi lek benga ri ni mah se, vawiin thleng hian a sawitu leh min hrilhna class room kha ka la mitthla their eng a sin.

Pathian I tih…
Kristian nun min zirtir a, mite mit hmuha mawi leh mawi lo pawh thlu lova, chhungkhat laina hnaite dem hial hlawha I Pathian rawngbawla I nupui fanute I kalsan fo mai te kha, a hunlaia mi thenkhatin hnunglam atanga an sawisel fek fek ni thin mah se, a rawng I bawl hian kan ei tawk chu min pe ve zel a. Rethei tak siin, chhuanchham leh riltamin I fate hi kan awm ngai bik lo asin. I Pathian biak hi a tha teh e, biakpui loh chi pawh I ni hlei nem

I inngaitlawm
Ni, zo pa ve mai, kut themthiam lem lo tak I ni a, ka pi ngei paw’n a mit I tlin lohzia a sawi ve zauh zauh chang te pawh ka hre ve thin a sin. Chutih rualin, hna I thawk hreh ngai lo va, I thawh theih chinah thahnemngai taka I thawk thin te; fiamthua kan veng pa pakhatin, ‘Kan khua atang hian mi pakhat vanram kai turn i se, U Saimawia hi chu a kai hrim hrim ang’ a tih fiamthu te ka hre chhuak zel a. Ka ngaihtuah kal zel a, I fapa hi zilhna tiang leka min vua-a kut min thlak awm reng ka hre chhuak thei miah lo.

I zaidam…
Ka hriatchhuah pakhat chu, theipui lo tura min tirh nia, enge min mawlh pawh ka hre chuang lo, kan theite rah hel ipte khat dawn ka va lawh tuma theite pakhat a ka chala min vawm avanga ka tah chiam kha chu ka thiam loh liau liau a ni e. Tin, ka tah ban hnua theite hel kha tak mai, ipte khat ei zo vek tura thu min pek laia ka rilru hahzia te, mahse u mipa fel tak leh rem hre tak ka neih avanga ka vanneih si zia kha. Theite hel kha fek fawk pakhat ei pawh a har tih min hriatpuiin, ka u-in inhnuai a pan vat a, ka nu puanthukhawl hunna dawhkan hnuaia chhuat awng kan hman remchan daih dan erawh ka u finzia ka hre chiang. Theite pakhat te tein ka thlak zel a, ani’n a lo paih bo zel a nih kha!

Tawngtai I ngaina…
High sikul kala mi inhnuai kan luah laia I rilru a hah thin turzia te kha. Mahse, I hunawl neih apianga kil khata I lo tawngtai leh mawlh mawlh thinte khan thla a timuang thin a sin. Inhlawhna remchang I hmuh loh avanga lekha them a, ‘Mampuia te unau, Rs. 5 ka hnutchhiah che u a, in mamawh chu Nu Mambawihi dawr atangin in lo la ba mai dawn nia’ tia I ziak han hmuh te khan bei a dawng thin, mahse I Pathian biak khan min lo venghim a. I tawngtaina rah zar zova, kan chunga mi fel leh tha tak tak kan tawng thin te kha, lawmthu sawi sen loh kan ba asin.

I khua a har thin..
Sawi tur a tam mang e. Ka nu’n hun lo tak maia a boralsan tak hnu chea I khua har thinzia te, I beisei san ve ber kei lah ka zirna leh hna avanga hmun danga ka awm daih te hian I khawhar chu hnem a hnekin ka tizual tih ka hre reng a, mahse tihtheih erawh ka nei tlem hle.

Kum kal taa kar tawp lama I zing tho khawharin dar 5:30 vela min rawn biak thin te kha, a chang chuan lo men rei ve thin nen, ka ning hman tep a. Mahse, tun hnua ka ngaihtuah let leh hian ka inthiam miah lo tih min lo hriatsak dawn nia. Pathian zara ka dam a nih phawt chuan, ka mobile phone bill chu hek deuh mai rawh se, ka hunawl neih apiangin a tam thei ang ber ka be zel ang che.

Ngawi teh, ral khat atang hian I fapa hi ka luangliam leh hle pek a. I bula thu ngeia han titi ka va chak ve le. Nula bem dan min hrilh te kha I sawi nawn leh ngai ta lem bawk si lo, Pathian zarah hun a awm ang a, hun remchang kan nei thuai ang chu.

Ka Pa, ‘Ka hmangaih che’
Vawiin, Father’s Day-ah ngei hian, ‘Ka Pa ka hmangaih che’ tih ka sawi nawn leh e.

P.S. Father’s Day ka hre chawp chilh a, post siam hram ka duh si. A mimal thil lutuk em ka hrethiam chiah law, chhiartute ngaihthiam ka dil e.

Mi(sual) Pa zawng zawng te, Happy Father’s Day chibai ka buk vek a che u…

I chhiar tur hi khua emaw hnam bik emaw hmuhsitna leh nuihzatna thu a ni lova, Zoram buai lai chanchin kha a hlimawm lam a awm lo lulai em mai a. A hlimawm zawnga thlir tumna a ni. Chutih rualin khatih hunlaia ‘nationalism’ buaipuitu zinga tamtakte pawh kha an thil buaipuiah khan an chiang vek bik lo hle tih a hriat theih mahna!

“Mahni-lo-maha kan dinhmun a that tawh nak laia, tun ataka Zoram Independence lo ngen ve te chu, zawh loh nghawngkawl a hrawk rek zawnga bah ang mai pawh a ni lo, ‘Pialtlepa liluh tum ang a ni’”(Zoram Politic Lumlet Dan, 2nd Edition, p-197) tia Pu A. Thanglura te ho an huk dum dum hnu, March ni hnih 1966 atanga Rambuai (Disturbed Area) a puan kan nih tak pawh khan Ngaizawl khua hian Zoram-in Zalenna a sual tih an lo hre ve lo ni ngei tur a ni. Pu C. Lalpara thuziah Buailai Boruak , Rambuai Lai leh Kei, tih lehkhabu Mizoram Upa Pawl chhuah atang hian rambuai laia Ngaizawl khaw chanchin ilo ngaithla teh ang u.

IN HNEH AWM DER SI LOVAH: Zan khat chu zanriah eikhamah a thim hle tawh tihah khan Champhai Keifang tlang sipai camp kha a alh ta hluah hluah mai a, sipai ho tih kan palh mai a nih an ring a. Khawzawl sipai camp-ah lah chuan silai a ri reng mai bawk si a, chan an kap a nih te an la ring ta mai mai a. An khaw chhehvela an han vahchhuah nak a lai chuan an khaw thenawmte lah chu ramhnuai mi (MNF Volunteer) chaw pein an lo phili buai hle tawh mai si nen, an ni buai thuhla engmah lo hre ve lem lo chuan thil awmzia an han zawt chiang ve ta a. Mizoram-in Independence a sual ani tih an han hriat chuan, an han ring lo laileng khawp a, ‘In hneh awm der mai si lo va, do duh suh u,’ te an tihsan mai mai a.

ENG DENCE PAWH SUAL ANG HMIANG: March ni 15 a lo thlen meuh chuan leh! Ngaizawl khua chu lo hal tur chungchangah an buai hle a. An chhehvel khuate ramri veng turin an hrilh a. An khaw thenawmte lah chuan, ‘Lo hal a sawi theih loh, kan ramin independence kan sual a nih hi, engmah rawn sawi tawh suh u,’ an lo tihsan mai si a. Ngaizawl VCP Pu Ngulhenthanga chuan, “ Eng dence pawh sual ang hmiang, chaw ei loin kan awm thei dawn em ni? Keini chuan independence aiin, hlo thlawh theih loh kan hlau zawk. Ramri chinah meilam sat chhuak vel ila, I hal mai ang u’’ a tih leh an khaw mipui chuan an ngam chiah si lo: A tawp a tawpah chuan nasa taka an inhnial hnuah hal chu an ti thlu ta nge nge a ni.

Ngaizawl khuaah hian India sipai an kal ve fo thin a, mahse sipaiin mipui an hmuh danah ‘politician’ hmel an awm lo nge ni, Mizo theuh mah ni ila, tawng hrang (Paite) an hman vang pawh a ni ang. Tin, an vanneih ve hrim hrim vangte pawh a ni thei bawk ang chu. Ngaizawl khua an han thlen chuan rin aiin an tha viau zel mai a. An khaw roreltute tan pawh a hahdam thlak em em thin a ni.

LAL PAHNIH RAWNGBAWL A NGAI TA SI: Tumkhat chu Ramhnuai lam mi an hotu pakhat a hote hruaiin Ngaizawl a han thleng a. Khua a curfew a, mipui a khawm a. Thu a sawi ta a, “ MNF pawl chauh Mizoram-ah an awm thei a, Party dang reng reng awm phal a ni lo, MNF hi in zawm tur a ni. In zawm duh loh chuan in duhna lam lamah kan dah ang che u” tiin. Mipui chuan, “ Duh ta lo ila, engtin nge min tih ang. Khawiah nge min dah ang?” an ti a. MNF hruaitupa chuan, “A harsa hleinem. Feet 6 a thuk leh feet 3 a zauah a ni mai a lawm. Tunah a duh leh duhlo VOTE kan la ang. MNF zawm duh zawngin in ban dinglam phar rawh u le!” a ti ta mai si a le. “An duh vang pawh ni loin, an hlauh vang zawkin mipui chuan an ban dinglam chu an phar suau mai a ni” tiin an khaw zirtirtu Pu Theua chuan a sawi.

A sawi zel danin, “A khaw pum mai chuan MNF supporter a nih loh theih ta si lova. MNF lam tang an ni zo ta vek mai a ni”. Tichuan, MNF lamin puakphurah an chhawr ta zel a. Tin, India sipai lam pawhin an chhawr bawk si a. A lehlam lehlam chuan hnial ngam a ni bawk si lo. Lal pahnih rawngbawlin an buai tawn ta chhen mai a ni.

TUIBUR CHUANG AN NEI BIK LO: Vawikhat chu Khawzawl Camp O.C. chuan Ngaizawl VCP hnenah tuibur a dil mauh mai a. An VCP chuan, ‘ka han zawng a nge’ a ti a. A kal ta a, a va hmu lem hlei lova. A hmuh loh thu pawh chu a hrilh lem lova. An ngawi liam ta mai a.
An lo kal leh tum chuan O.C. chuan, “Ka tuibur zawntir che kha i hmu ta em?’ tiin a zawt a. VCP chuan eng danga chhang ta lem lo chuan, “A ni tak ka pu, ka han zawng ngial thin a, tuibur chuang a lo awm reng reng hleinem maw le,” a ti theuh mai a. An O.C. pawh chuan tihngaihna hre hek lo. A ngawihsan ve ta mai mai bawk a.

NGAIZAWLAH CURFEW A THEIH VE LOH: Vawikhat leh pawh, Aizawl atangin helicopter-in paratrooper sipai a rawn thlak a. Chung sipai ho chuan Ngaizawl chu an awmchilh ta a. VCP hnenah chuan, “Zan dar 5 atanga zing dar 6 thleng curfew a ni ang, tiin ka pu tlangau tir rawh” an ti a. An VCP chuan, “E ka pu, keini chu curfew ve theih kan ni lo, zan lamah hi kan in kawmkhawmna hun neihchhun a ni a, zu te kan inho duh thin a. Curfew a theih ve loh, Ramhnuai mi in hlau a nih chuan keiman kawtchhuah tinah tlangvalho ka duty tir mai ang, hlau reng reng suh, hetah nangni hoin awm bawksi chuan ramhnuai mi chu an lokal lo reng reng ang” a ti ve tlat mai a. Sipai ho pawh chuan an curfew ta lem hlei lo va.

MOVEMENT PERMIT A HLAWMIN: Vawi khat chu, “Pem hruai tur an awm a, a thei apiang kal tur a ni” tiin tlangau a lo au a. An kal ta hlawm a. Chumi ni chuan Assam Rifles ho Ngaizawlah an lo lut teuh mai a. Tlaia pem hruaiho an lo thlen chuan sipaiho chuan VC Permit an neih leh neih loh an lo zawt zel a. Tuman an nei si lo. An hotupa chuan a dahhran tir zel a. A khungkhawm ta teuh mai a. An VCP hnenah chuan, “Khua atanga kal chhuak tur reng reng VC Permit an keng zel tur a ni tih order pawh i hmu si a. Enga tinge permit i pek loh?” tiin an zawt a. Pu Ngulhena chuan, “A thei apiang kal tur ka ti mai si a, a kal zat tur pawh hre hek lo i le. Chubakah, a hlawmin lehkha pakhatah ka siamsak mai a ni. A mal mala ka pek chuan ka lehkhapuan pawhin a daih dawn lo a ni” tiin a chhang a. Sipai hotupa pawh chuan, “A nih tak chu” tiin a mi mante chu a chhuah leh ta vek mai a ni.

NGAIZAWLAH MNF AN LUT: Vawikhat leh pawh, Ngaizawlah MNF mi 8 an lut a. An zinga pahnih chuan silai an pu a, a dang zawng chuan tiang lian tawk tak am hawl bawk a. VCP hnenah chuan chaw an dil ta a, chi an dil, bel an dil leh a, vaihlozial nen, an kal ta a. Chu thu chu Khawzawl Camp O.C. Second Lieutenant Mukharji-a chuan a lo hria a. Ngaizawl-ah han kalin investigation a han la a. MNF ho lo kal thu sipai camp-a a report loh chhan chu point a hmangin an VC te chu a chhuahchhal ta a. VC te chuan, “Mi 8 lek chu India sorkar pui meuh chuan a er lawng chu kan ti mai a. Tin, chubakah, kan rawn report dawn tih an hriat chuan min vaw nek anga, an tlanbo leh daih si anga, nangnin in rawn man hman dawn chuang si lo” tiin an chhang a. Camp O.C. tihngaihna dang hre lo pheng chuan, “ A nih leh tunhnuah chuan an kal liam hnuah in rawn report mai dawn nia” a ti ngawt mai a ni.

Kum 1968 kum bul lam, Ngaizawl khaw chhehvela khuate an khawm deuh vek tawh hnuah, a hnuhnung berah Ngaizawl khua chu Khawzawl-ah khawm a ni ve ta a ni. Mahse Khawzawl thleng chu in 20 emaw lo liam anni lo ang. A hmaa za nufa khua ni thin kha, in 70 zet chu tiau ral an kai a mahse Burma sawrkarin tiaukamah a rawn hnawhthlak leh avangin Hnahlan-ah te awmhmun an khuar hlen ta. In 60 dawn lai erawh chu Burma lamah bawk an chho leh ta a ni. Kum 1972 a Mizoram U.T. a nih khan in 10 emaw lek chuan an khaw hluiah hian an han inbawk leh ta a ni.

A sei deuh tawh avangin Pu Chawngzuala ziak, ‘Ka Hringnun ZinKawng, 1st Edition‘ phek 23 a mi hian khar tum tawh mai ang aw.

‘Vawikhat pawh ramhnuai lam Parliament Speaker Pu Vanhela leh a hote Ngaizawl khuaah hian zankhat an riak a, chu chu misualin Khawzawl vai sipaite hnenah an lo zuk report a. Pu Vanhela te kal liam leh tawh hnuah Jamadar hovin vai sipai chu an han kal a. Ngaizawl VCP hnenah chuan, “Enga tinge i khuaah Speaker a riak a, i rawn report vat loh, nangmah man i duh em ni, ramhnuai lam sipai an lokal chuan report vat tur kan ti si a.” Jamadar chuan a han ti a. Ngaizawl VCP chuan a en ang he haw a, “E ka pu, sipai an inti leng leng lo, Sipikal a inti tlat a lawm,” a ti ve mauh mai a. Tih ngaihna an hre lo hle awm a sin.’

‘Kan Ram buai chungchangah khan Mizo mipui zawng zawng ngaihdan chu a inang vek thei lo tih hriat a ni. Mahse, Mizoram leh Hnamin Zalenna kan sual a, Pathian min siam leh hnama min din ang ngeinn kan pianpui dikna chanvo chu humhim turin kan bei a ni. M.N.F. rammute khan a takin Zalenna kan sual a; a takin nunna kan hlan a; a takin Zofa mipuite pawhin kan tuar bawk’ (R. Zamawia, Zofate Zinkawngah- Zalenna Mei a Mit Tur a Ni Lo, 2nd Edition, P-944)

Pawl Sawm Exam form kan fill-up laiin kan Principal in ”I hming engtia dah nge i duh? A ngai ang hian kan dah dawn a mi?. ‘F’ hi eng nge awmzia?” tiin min zawt a. Pawl Sawm a tanga hnuai lam zawngah kha chuan ‘F. Lalrosanga’ kha ka ni thina. Kan Principal hnenah chuan ‘F’ chu FANCHUN tihna a nih kha ka ti a. ”E he! Pawichhia te maw i nih? Pawichhia te” minti a, ka zak lutuk kha, ka thinrim pawh ka tilang ngamlo hial.

Office chhunga Zirtirtu dang awm lai leh Ka zirlai puite Exam form fill-up ve tur awm lai a khatiang thu dawn kha chu ka zak lutuka, hawina lam tur pawh ka hrelo a, awmdan pawh ka thiam tawhlo.!. Mahse ka nihna chu ka nihna a ni tlata, eng angin zahpui mah ila a sawt chuanglo a, ka nihna a ni tho tho a.. FANCHUN in ka nihna a tilang a nih chuan tiin, kan Principal hnenah chuan ka hming bula ‘F’ dah tawhlo in ‘Lalrosanga B Fanchun’ tiin Class-x Exam form ka fill-up tir ta a.

Kan Principal in ”Pawichhia te” mintih lai khan thinrimin zak viau mah i la, tun kum 7 vel liam hnua ka ngaihtuah that leh hian ‘Pawichhia’ minlo tih kha a lo awm reng a lawm le tih hi rilru natak chungin ka pawm thiam ve ta..:(

Kei ni Lai ho chu ‘hnambo’ a lawm kan lo nih chu.! Tawng hran leh ze hran Pathian in a hran tein minlo siam sak ve kha humhalh loin leh ngainep in; hnam dang ho hnenah ka pil zo ta! Hnambo, mahni tawng leh zia pawh hrelo chu ngati nge ‘Pawichhia’ mintih mai loh ang?.

Khawvelah Lai hmun hnihah kan awm a:
Hmunkhat chu Burma lamah. Burma lama awm ho chu kawl ho karah an awm a, Kawl tawng hmangin, Kawl zia an hmang a, a then ram inrelbawlna thatloh vangin ram dangah an ral tlana, Vunvar, vunsen, vundum ho bulah UN in a thendarh hlawm a.. Chung ho pawh chu reilo teah an bo thuai dawn.. An mahni inti ‘Lai’ em em mahse an fa fa leh te chu an awmna ram/ an ral tlanna mi ho angin an chhuak tawh ang.

Hmunkhat leh chu India ah. India a Lai awmna chu Mizoram ah a ni. Mizorama ‘Lai’ awm ho pawh Lusei ho lakah ka pil bo a, Lai kan ni tih chu inhre mah ila, tawng hran leh ze hran kan nei tih pawh kan inhre tawhlo. Khiangte, Fanai, Bawihtlung thenkhat te phei chu Lusei ah beh an tum thina mahse “Pawichhia’ anlo tih thin a vang hian an hrang leh te hian ka hre thin.. Mizoram Chhim lamah ADC hran kan nei ve a, Khaw hrang hrang a awm ve nual a ni. Kan khawpui chu Lawngtlai a ni ve ngei a. Kan Lawngtlai khawpui hi han en ang u, ‘Lai fa’ awmkhawmna hmun chu a ni ngei sia le.. !

Kan tawng leh zia ngainepin, kan nihna kan zahpui a. ‘Lai ka ni’ inti mah ila, Lai tawng kan hmusita. Keimahni leh keimahni kan in hmuhsit chuan tu in nge min ngaisang tak ang le? Chuti chung chuan ”Pawichhia” min tihin kan la thinrim ve em em a.. A zahthlak a, a lungngaih thlak a nih hi ti ru kan awm dan hi..

ENGTIKAH TAK HARH CHHUAKIN IN LUNGRUAL VE THEI TAK ANG U MAW!

A rel thiam ngei e chung Khuanu’n,
Mimang piang zaleng zawng tan,
Alo duang e kei ka tan Zirtirtu;
Nunkawng tluangtea ka zawh theih nan.

Chun leh Zua hmangaihna dawng phalo tan,
Chun chang a chang a, zua chan a chang thin.
Chhiahhlawh nun ianga hna zahawm thawk in;
Tuk chhuak in ka tan a inhlan.

Thiamtin hrila finna pe tu,
Heilo liam a rawngbawltu ropui,
A kim thei lo’ng ram kalsiam pawh;
Ka fak ka zirtirtu tello chuan.

He ni bik i tan liau liau lo thleng ah hian,
I phu ngawih ngawih chawimawina kan hlan che a,
Kan theih tawk tlem hle mah se;
Kan zah che a, kan chhuang a che.

Aw!! Ka Zirtirtu,
Khua hual in dam reng la,
Ngalfim in chawl nang che.

September ni 9, 2013 zan dar 10:45 PM hi zaithiam leh hlaphuah thiam CFL Hmingthanga lei taksain he khawvel a chhuahsan kum khatna a lo ni ta a, a lei taksa chuan thawhlehna nghakin Samthang thlanmualah riahrun a bel mek a ni. He a thihcham pual hian amah ngainatu leh a fans khawvel hmun hrang hranga awmte chuan urhsun takin mahni hmun theuhah hun hman an tum a ni. CFL-a fans i nih chuan facebook Group pakhat, CFL HMINGTHANGA Thu Leh Hla i lo join ve dawn nia. Tin, Thawhtan tlai dar 5:30 ah hian CFL-a pualin Doordarshan, Aizawlah CF_a u Pi Lalngovi w/o Pu Thasiama te chuan CFL-a zai pahnih an thlang a, a zai leh a hringchan thlalak hrang hrangte en theuh turin CFL-a fans zawng zawngte min sawm a ni.

Nikum September ni 9 zan dar 10:45 khan Khawbung PHC ah TB natna avangin CFL-a hian khawvel a lo chhuahsan tawh a. Khawbung PHC ah hian thih ngam khawpin tun hma khan hliam na tak a lo tuar tawh a;nimahsela tha taka lo chhuakin zaiin zofate min awitlei a nih kha. Mahni damna hmun ngeia boral leh ta chu CFL-a hi a lo ni ve ta a nih chu. CFL Hmingthanga hi a boral tuk hian mi tam takin thlanmualah an thlahliam a, a ruang hi thlanmual an panpui lai hian ama sak ngei, “Ka nau vala” chu YMA Information Centre atangin an play a, mipui a vel tap nasa hle. CFL-a thih thu hian zoram mai bakah khawvel hmun hrang hranga zofate a deng chhuak hneh hle a ni. Champhai District Promotors’ Club chuan nikum November khan CFL-a Tribute Concert an siam a, November ni 22, 2012 a CFL-a lungphun Samthang khawtlangin an neih pawh khan Concert an buatsaih bawk a ni.

A chanchin chipchiar leh kimchang chhiar duh chuan a hnuaia link hi tlawh mai tur a ni e:

http://jlremsanga.blogspot.in/2013/09/cfl-hmingthanga-thihcham-vawikhatna.html

Pune Mizo Christian Fellowship project
Tahrikni 13, October 2013 Pathian ni khan Pune Mizo Christian Fellowship (PMCF) chuan an project pakhat – ‘khawpui danga Mizo Kristian-te tlawha feh chhuah’ tihlawhtlingin Bangalore Mizo Christian Fellowship (BMCF) min rawn tlawh a. Pathian fak leh chawimawina hun nuam, hlawkthlak tak kan hmang.

Mizo
PMCF chairman-in tawifel taka Mizo a sawifiah hi a tha riau. Mi chu khawvel puma mihring sawina; Zo a nih chuan Mi tam tak zinga Mizo-te tihna a ni a. Mizo Christian Fellowship hian Kristianna bakah Zonunmawi a keng tel a ni ti a. A pawmawm khawpin ka hria.

Entawntlak – PMCF
PMCF-te hian feh chhuah project hi an ur lawk nasain an inpuahchah tha hle. Kar hla tak atangin music instrument kim chang nena rawn thawk chhuakin, zaipawl nung tak leh thiam tak an neiin; an hla sak reng reng rimawi tum chawp vekin an rem vek bawk. Member tlem zawk ni si, an inpekna a fakawm thlawt.

Engpawh ni se…
Tirhkoh Paula’n a sawi angin, kan thlen chin atanga hmasawn tura rawngbawlho kan nih angin, PMCF fehchhuah hian Isua Krista kan rinna te, a rawng kan bawlna kawngah leh vanram kawng kan zawhnaah chakna thar min siam sakin kan lawm tak zet a ni. Hun tha tak in siamsaktu Pathian chu fakin awm rawh se.

Pathian fakin hlim takin kan zai

BMCF hruaitute leh PMCF member min tlawhtute

BMCF Zaipawl

Duet – Puipuii & Dingdingi (BMCF)

Duet – Pari & Richard (PMCF)

Kei VaiVa te reuh hian October ni 25 (Zirtawpni) hian Champhai Vengthlang Presbyterian Kohhran Biak Inah ‘Tiam tlat e’ ka ti ve dawn a. Misual member zawng zawng te ka rawn sawm che u a ni e.

Sandman testimonial: VaiVa hian amah ringawt hi khawiah pawh a ngaihtuah a, BiakIn chhungah te pawh, chuvangin kan lawmpui hle e.

Masihi Sangati (Non Mizo tia kan hriat lar) Convention vawi 28 na chu tluang takin Sihphir Presbyterian Kohhran Biak Inah tluang takin dt. 18th.-20th. Oct. khan hman zawh a ni ta. He convention a speaker chu Rev. R.Lalthangvunga a nia; thupui chu ‘Isua chu kawng, thutak leh nunna’ (Joh 14:16) a ni. Speaker hian thupui hi tum nga sawiin Pathian Thlarau Thianghlim pawlna nasa takin a thleng a ni. Convention chhung hian speaker in thupui a sawi bakah bible study-te neih a nia; councelling class neih reng a ni bawk. Pathian ni chawhnuah Sihphir bialtu pastor Rev.H.Laltlanthanga’n Lalpa zanriah Sakrament a theh bawk.

Kum 1965 daih tawh khan Nepali Kristian ten anmahni pualin inkhawmpui hi an lo nei tan tawh a; Nepali Kristian Fellowship tih hming pu a Synod hriatpuia an din chu 1975 khan a ni.

Kum 1975-1980 lai vel khan Khawruhlian Pastor bial chu MEA zirtirna diklo in a nuai vak mai a; chumi laka invenna chu ‘luanchhuah’ niin bial hruaitute chuan an hria a. Bial comt. te chuan Ramthar field a chhuak kher loin bial chhunga Nepali/Santali leh hnam dangte zinga campaign an rel ta a. ‘Bial Ramthar Comt.’ an din ta nghal a. An phur tlang ta em em a. Vai hla leh vai khuang bente an zir ta tluk tluk maia. Hna thulh hial in an inkhawm reng thin. An hnathawh chu Lalpa’n mal a sawm a; ringthar an awm ta nual mai a. An ramchhunga hmun laili ber leh vai tamna ber Khanpuiah vai Biak In an saa; hei hi Mizorama hnamdang Kristian Biak In ding hmasa ber a ni.

Aizawl khaw chhung leh pawnah ringthar an lo pun tak zelah chuan puja laia an lunglen leh mai an hlauh avangin inkhawmpui hmasa ber chu 1982 khan Khanpui khuaah neih a lo ni ta a ni.

Mizoram chhunga hnamdang zinga rawngbawlna hi a tangkai hle a; NE India, Central leh foreign-Nepal thlengin Masihi Sangati rawngbawlna avanga Kristian lo ni tawh ten anmahni khaw lamah rawngbawl tu tangkai leh kohhran dintu leh kohhran ban pawimawh tak an ni thei zel a ni. He rawngbawlna avang hian hnamdang pastor paruk zet chherchhuah an ni tawh a; Mission field hrang hranga tirhchhuah engemawzat an awm tawh bawk.

Convention hi tarlan tak ang khian 1982 khan Khanpuiah neih tan a ni a; kumtin nei chho zelin 1994 khan Silcharah Mizo driver thah avanga buaina a chhuah avangin thulh a ni tih mai loh chu tluang taka neih chhoh zel a ni a; tluang taka 2007 thleng khaihlak awm lo a neih a nih hnuah kum khat dana neih a lo ni ta a ni.

Tunhmain convention hi Mizoram pum huapa neih thin a ni a; tlem lai atang khan chhim bial leh hmar bialah then hran a lo ni taa; tun tuma kan tarlan hi hmar lam chan a ni.
Sihphir Kohhranah hian 1997 khan hlawhtling taka neih a lo ni tawh nghe nghe a ni.

Tun tum convention-ah hian ringthar 47 lai an awma; an tana kan tih theih tawk tawngtainaah keini ho hi I tang tlang ve teh ang u.

Thalfavang Kut an tia,Hmuifang lamah … (Click image for better resolution)

A hmun hi a nuam khawp mai…

Mi pawh an kal thahnem fu,traffic pawh a chang chuan a jam ve hial…

Tleirawl pawh an kal hehehe

Ka mi lohna a rei ta a niang,ka bo huih mai.

Saikhumphai leh Vaphai khaw inkara buaina a chhuah hma kar khan Vaphai ah ka chho a. Tichuan kha tiang thil kha athleng ta rup rup mai si a. A pawi in, a lungchhiat thlak em em a ni. Ka mit ngeiin ka hmu ve a, ka tel ve bawk a (Vaphai khua ni ve miau hek). Post hlui khatiang inziahna kha ka’n hai kual a, ka hmu nual mai. Ziah ve a tulin ka hre tlat ta a.

Hemi issue ah kher kher hi chuan Vaphai kan thiam lo hmasa a ni ti ila a sual lo ang. ‘In khua ni si i va tan lo ve’ min ti mai thei, kan sawi zel ang.

Saikhumphai hi (Keini Vaphai ho chuan Saikhumphai-bawk ti ngat in kan ko) a dinna a reilo. A din tandan chu sawi vek lo mai ang, a sei dawn lutuk. Vaphai khua, leilet a hnathawka riak thin ten an din a ni. Khua a ni lo, bawk a ni. Tichuan hun alo kal zel a, mi an lo pung ve zel, khawchhak tlang dung a tang kan unau te an lo pem khawm a, Vaphai atang ngei pawh zuk in bawk an awm ta (Vaphai atang an pem lo a, an in sawn mai a ni. Vaphai veng pakhat ang a ni). Tichuan VC hran ngiat tham te an lo awm ve ta reng mai. Hetianga mahni in relbawl hrang duh a an awm hi ka hriat sual loh chuan 2003 vel a tang a ni a. A mei zang hlap tu ber hi kan khaw pa ngei mai Pu. Lalchawivela a ni. Mahni in lak hran duhna an ti lang lian telh telh a, party lam atang eng tin tin emaw politics khelh nan an hmang a, MNF VC kan neih laiin politics khelh nan kan indan tir ang che u an lo ti pek emaw ni, chu document ngei chu a ni court-a Saikhumphai-bawk ten an lek lam viau kha. Tichuan Vaphai khaw mipuite chuan kan hotute tih dik loh chu kan tuar ta zel a ni. Hetah hian in thupsak a, kan thiamna ngawr ngawr chauh sawi ka tum lem lo a, dik lo chu a dik thei lo miau si hek!

Vaphai khua te hian kan in rawt phur a, kan khaw veng pakhat kan zu hal hluah ringawt a ni lo a, rei tak atanga in mun tawh, khaw chhung mipui ten thaw dep dep a kan thlir a ni tih min hriat pui ula a tha khawp mai. Hetiang hi a thleng thei tih an hriat avangin Val upa chinchang hre deuh te khan min lo hup bet hram hram a, zawl an lo dawh hram hram a ni zawk a. Zawl dawh zawkah kan tang char char a, a te zawk Saikhumphai-bawk hian min vo kher kher zawk titih ta mai. “Vaphai khua hian an ngam tak tak lo ang” an ti a nih mahna. Khawchhak lam unaute, helaia Saikhumphai-bawk a rawn pem te hi atlangpuiin tlawmngaihna ah an hniam em em a, Vaphai khaw ram kang ah te hian kangmei min ven pui a min thelhpui awm hi ka la hre lo reng reng mai a, an veng chhak lawk te pawh kang se, an tana a hlauhawm lem loh chuan an thlir vel mai mai a, sangha lah nise Tiau dung tluan an suar tluan a,an vai zo. Kan naupanlai (ti ve khanglang ila, a la rei lem lo mahse chuti chung pawh chuaan…) a ngaw khep khup, zawng rual pawh kan hmuh sup sup na Tiau kam ngawpui te kha min tuk darh sak zo a, thingzai a tan tam tak an kit bawk a. Khaw hmangaih tak rilru atang chuan a na ve em asin. Khang ho kuta Vaphai khaw ram tha lai tak mai, leilet hmun leh thlawhhma atana tha lai han pek birh kha chu kan phal bik thlawt lo a ni. Mahse kan tuhrah kan seng kha a ngai ve miau si a. Border Trade te Saikhumphai a dah tura tih a lo nih khan, Saikhumphai-bawk mite nena buaina kan neih avangin Farkawn khuaah Trade center kha sawn mai thei dinhmunah a awm ta mai a. Khami rilru na kha tam tak an awm bawk a ni.

Tichuan tha takin kan indawr chho anga, an ni pawhin zawl an dawh ve ang a, Vaphaiah lo chho in kan cheng ho anga kan tih laiin kawhmawh an bawl leh ta a. Court ah an zual ko a, rambuai hma atang a kan awmna a ni tih ang zawng a thu an han vei vir te kha chuan tlangval thin a ti sa a lawm. Tichuan 2012 khan Vaphai khaw thinrim chuan an in zu thiah tumin a khaw nawtin kan chim thla a, a hnarkaitu in 3/4 vel chu kan zu thiah sak a, in halna em chu a thleng lo. Upa te khan thalaite kha min beng dai hram hram a, IR ho an lo duty bawk a. He mi tum pawh hian ka tel ve nghe nghe a. Tha taka sawi laia an awih duh loh avang khan kan zu rik rap ve a ni. A khaw mi tam zawk te chuan bawk atang a Vaphai khuaa rawn insawn chu an hreh lo, mahse an hotu deuh te kha an hmaizah a ni chek ang chu in 2 vel bak an rawn in sawn ta lo a. Court ah an appeal leh ta. 2013 kum tir ah khan Court thu a lo chhuak a, hnehna an chang ta mai. Khatah tak khan a ni Vaphai tlangval thinrim kan in veng seng ta lo a ni. Court-ah Bawk mite nen chuan kan in khing ta a, khati khawp khan document kan nei tha a. Kan dinhmun a that fe zawk lai a, Vaphai khua min king thla tawp thei kha mipui mak tih a la ni reng. Rilru a na bawk. A thawh hnih nan Bawk lam panin a khaw nawtin kan chim leh ta a.

Tlangval chakvak te ruang chaicheh in khua kan lut a, IR te leh kan nula ho lo in dan buai lai a in lo thiah zawh vek kha kan tum ber a. Upa lam leh nula te kawng pangngaiah IR ho nek thla turin an kal a, tlangval ho khua kan luh hma chiah khan nula ho te thawm leh tear gas puak ri khan Vaphai khaw tlangval thin tawt a ti puak a ni ber ang chu, thil duhawmlo tak kha kan lo ti ta a. Khuaah chuan Bawk mi sa tu mah an lo awm lo a, an hlau an lo tlan bo vek a ni. In inhnaih te te a nih hlawm avang khan an zirlaibu, Bible leh an thawmhnaw te, an bungbel te kha theh chhuak ve mah ila a hliau kang vek tho a. A rapthlak em em, tih bak chuan sawi ngaihna a awm lo. Sawi tam lo ang. Vaphai khaw nula te, tlangval ai mahin an huaisen a ni. Fak an phu.

Thir hi a lin laia den tur a ni a, hmana a awlsam lai khan kan khawtlang hruai tu te khan a na chang hriain ro lo rel sela chu hetiang hi a thleng lo ang. Tin, a nih tur ang ang a ni tawh a, Saikhumphai-bawk a hruaitu (mipui thlan an ni chuang lo a, hotu awm a awm ve tawp an ni ber) te kha in phah hniam in Bawk atang Vaphai-ah khan rawn insawn chho mai se chu eng mah athleng lo ang. Sorkarin transportation a tum vek dawn a, tin, sawrkar atanga compensation kha atlem an ti a nih chuan demand belh in Vaphai khua te phungbawm ah sawm se, inpui tawn ila engkim hi a tha mai tur. Thuneihna duh lutuk avang in nu nau ten an tuar ta vak mai a, a pawi tak tak a ni. Vaphai khua hi khaw sual tak kan ni lo a, ramri dep a awm kan nih avang erawh chuan chanchin tha vaklo hi kan nei ve zauh zauh a ni.

Khatia kan buai lai khan sawrkar atangin Saikhumphai-bawk mite chuan ration an dawng a, Vaphai khan chaw nghei a dah chu a tum bik lo. Mahse, thil kan ti ro ro tawh a, Bawk a awm tir loh tawp law law kha Vaphai hruaitu te duhdan a nih avang khan an hnena tanpuina lut turte kha an dang ta a. Chutih laia Farkawn khuain Vaphai khua pawh rawn eih lo a an lo zu che ta mai kha, Vaphai khua an zahlo hle a ni. Thil atir atanga min hriatpui vek tu te kan khaw thenawm an ni a. An politics ah chuan Saikhumphai-bawk an hmangaih em em vang aiin, Border Trade an khuaa a awm theih nan Bawk-a mite hi chhuak lo se, buai reng se. Keiniin Trade Center hi chang ila, tia an politics khelhna a ni mah zawk. A hmuna cheng ka nih avangin he thil hi chu a chiang khawpin ka hria. (Farkawn leh Vaphai hi chu khaw iner tak kan ni ve hrim hrim a)

Ka sawi hmaih hauh loh tur chu hotute hi an pawimawh a. Khaw mipui/ram mipui te dinhmun hi an kutah a awm a ni. Tha leh dik taka rorel mai hi a tha a. A chang te chuan inphahhniam a ngaih changte a awm ve fo a ni. He thilah hian Vaphai mipui kan thiam lo a, Bawk hruaitu te pawh an thiam lo. Lungrual taka awm ho hi a tha ber a. Vaphai khaw mawng ka hlim deuh a nih pawhin ka hmuhdan ka ziak a ni ve mai a. Thupawi a nih em ka ring lo. Mimal ngaihdan ka rawn tarlang mai a ni. Vaphai khaw mipuite hian min tawmpui vek kher lo ang. Tumah ka tih chhan lo tiin ka’n in tlawh khalh sa ange. Saikhumphai-bawk mipui te nen hian kan inhaw hran chuang lo a, kan la in kawm bawrh bawrh a. Bawka kan kal chang pawhin chawthing kan zen rawk rawk tho a ni. An ni pawh an rawn bazar a, tumah kan in enhrang chuang lo. Vaphai in an chunga an thiltihah Bawk mite chu an rilru a na in engemaw chenah Vaphai pawh an dem ngei ang. Vaphai pawhin heng thleng thleng a kalpui ngaia Bawk mite an awm hi an puhmawh ngei ang. Mahse, a mimal takin inhuatna pakhatmah kan nei lo a. A hma ang takin inpawh tawhlo mah ila, khaw khat kan nihna leh a thlum a al ei za kan nihna hian kan in huat phah reng reng lo tih hi Mizo mipui te hian min hriat sak hlawm dawn nia.

Ni 25.07.2014 zân khan Pianchampha phak lâwm zo thalai thenkhatin Zampuimanga thlan bulah boruak thengthaw an lo va dawngve a, an lo hlim ve viau tepawh a ni mahna le, an mit meng te pawh a lo zim deuh tawh pawh a ni maithei e, kawngpui phah bak zawh liam in, a tam zawk an boral ta a. A zialo takzet mai. Ka tawrh pui hle ani!!!

An chetsual dan leh thih chhan thu lêngvel ah; thenkhat, in ti fing fâl leh in ti fel fâl deuh ten “Awm loh natur a kan awm in, kan tih loh tur sual kan ti thin” ti in tawngkam feikibar nen an lo khawh zui zuai zuai mai pek a. “Sualna nei lo chuan dêng rawh se” tih Bible chang hmanga den let siahsiah mai tak kha ka nap hlawm!!! Ka ti ta lem lova.”Mi vanduaina diriamtu chu hrem lohin a awm lo ang.” (Thufingte 17:5) tih châng te hi kei ni erawhin vawng reng ila a tha hle.

Misual tak pawh an lo ni thei. Amaherawhchu, Angel tekhan an chhungte lo rawn hmasa ta tehreng se ” kan hnenah la cham rih rawh se” an ti ngei hian ka ring!!! Ui tu an la nei a, Hmangaih ngawih ngawih tu an la awm ve a, ngai vawng vawng tu tam takin an thlah liam a, chhungkua an la nei tih hi hria i la. Tiang lam hawia boral reng reng te an ruang zah zo lo paw’n an thlarau tal zah i la, a Kristian viau in a rinawm.

Misual tak pawh lo ni teh reng sela. Pathian ngei pawh in a “Ka thinlung ang pumi” a lo tih hial “Ka fapa Absalom, i thih ai thi thei tehreng ila” ti a tah hawm hawm tu, Lal Davida khan fapa ‘Vatirhkoh’ a sun rêng rêng lo. Fapa sual, a pa lak a hel, a pa lu lak tum zawk ani a țah ni. Kan Pathian hi Misualte thihna ah hian a lawm ngai lo; “I hmelma te hmangaih rawh” ti a min zirtir tu hi misual te tawrhna ah hian a na thin zawk a, Misual te hremna ah hian a lungche fo thin zawk a sin!!! Keini a lova thlarau chawrche zawk te kan lo khengbet ve chawt chawt mai thin hi chu a ringtu hna lo viau mai.

Sual haw tawk lek hian kan piangthar emawni ka ti thin. “Keimah avangin tlangval Absoloma chu va dim ang che u” tih thu zawm ai chuan kan diriam zawk anih hi. Lalpa’n Jeremia hnenah chuan “A nun a ka nun chhung chuanmi suaksual thihna ah hian lawmna reng reng ka nei lo” a tih kha maw le. Kan ram hi inenfiah kan mamawh sualte haw tawk leh hmusit tawk lek hian i piangthar lo teh ang u. “Ephi4:32 tin inkhawngaih tawn a lainatna neiin awm u la, Pathianin Krista a angaidam che u ang bawkin in ngaidam tawn rawh u.” Tih a ni si a.

Thihna chungthu ah hian duhthlang thei kan awmlo a. Thihna hi a chhan leh a vâng a zira nâ a nalo a nilo a; Hmangaihtu thinlungah chuan hliam a hnutchhiah hi a in ang reng fo thin. Tap te tahpui a, Lawm te lawmpui tu Kristian ni tur in kan thlarau khawhawi ti zau lehzual i la, kan lei te veng fimkhur tawh ila a van tha dawn em… Lalpan malsawm rawh se!!!

NB: Be careful with your words. Once they are said, they can be only forgiven; not forgotten!!!

Z.R.Thahmingliana
26.7.2014 / 3:22 Am Tuithiang.

(He thuziak hi lampui changkhat intawn nikhua a biak hmasak ka chan ngai loh leh tawngkamtha a min thlah bânglo tu te ; Kumin kumtir lama Fam ta Pu Para leh U Dê a tan ka hlan e.

E khai! Zanin inkhel chu a lo hmuhnawm dawn hle mai. Group of Death inkhel tur a ni a, a pui ngawt ang. Anni hi an khelh hnihna tur a ni tawh a, Denmark leh Germany hi an chak ve ve chuan Quarter Final an lut chho dawn a. Chutih rualin Portugal leh Netherlands hian mualpho taka tlak an duh hauh lovang.

Lviv — Group B: Denmark v Portugal (09:30PM)
Denmark hian mak tak maiin an game hmasaah Netherlands chu Michael Krohn-Dehli goal hmangin an hneh a nih kha. Hei hi tun á¹­um Euro-a upset thleng hmasa ber a ni. Qualifying lamah Denmark leh Portugal hi Group H-ah awmin an inkhelh hnuhnun ber khan Denmark lam hian 2-1 in an lo hneh tawh a, hetah hian hmanni-a an chakna goal hlu em em mai thuntu Krohn-Dehli khan goal a thun nghe nghe. Goal thuntu pakhat zawk, Nicklas Bendtner hian ram tana a game 50-na tur a khel dawn a. Portugal singhaktu Rui Patricio tan a tawrhhlelhawm viau tura ngaih a ni.

Denmark coach Morten Olsen chuan an khelh hmasa result avangin quarter final luh an inbeisei thu sawiin, Portugal an khelh turah nasa taka inrintawkna a pek thu a sawi. Chutih laiin Portugal hian an game hnuhnung pali-ah goal khat chauh an la thun a, tun tournament an game hmasa berah Gemany an hneh lo bawk nen, an coach Paulo Bento chuan Denmark an khelh hunah hneh ngei an tum thu a sawi.

Denmark hi an chak chuan an tlang chho tawh dawn a. Chutih laiin Portugal tan erawh chance a chhe hle thung ang. Portugal an chak lohva Germany an chak bawk si chuan an tla vang vang dawn a, a nih lohva Germany an lo vanduai a nih hlauh chuan chance chhe të chauh an la nei dawn a ni. Denmark team-ah hian Simon Poulsen leh William Kvist te’n first match-ah yellow card an hmu a, zanin an hmuh leh chuan next match an khel thei lovang, Chutiang bawkin Portugal palyers Fabio Coentrao leh Helder Postiga te pawh zaninah an khelh fimkhur a ngai hle dawn a ni.

Denmark probable lineup: Andersen, Jacobsen, Kjaer, Agger, S Poulsen, Zimling, Kvist, Rommedahl, Eriksen, Krohn-Dehli, Bendtner.
Portugal probable lineup: Rui Patricio, Pereira, Pepe, Alves, Coentrao, Meireles, Veloso, Moutinho, Nani, Almeida, Ronaldo.

Kharkiv — Group B: Holland v Germany (12:15AM)
Netherlands hian pawnthuah têl an duh loh chuan Germany an hneh ngei ngei a ngai tawh ang. Chutih rualin Germany pawh hian an hneh chuan stage sang zawk an thleng dawn tih hre chungin an inkhel dawn a, world top four-a lang pha ve ve team inkhel hi a theuneu dawn lo hle a ni.

Netherlands hi an veteran defender Joris Mathijsen khel thei tura beisei a ni a, hei hian a defender-te a tikhauh sawt dawn a. Coach Bert van Marwijk hian khelh hmasaa goal chance eng emaw zat hlahtu Robin Van Persie aiah Huntelaar a luhtir dawn niin a lang. Persie hian fans dem a hlawh hle a, coach hian a thlavang a hauh va, Dutch mipui sawiselna chuan Netherlands team a tihchak tur thu a sawi.

Netherland player Mark van Bommel hian match hmasaa yellow card a hmuh avangin next game khel thei tur chuan zanina yellow card a hmuh loh a ngai dawn a, chutih rualin player pahnih Holger Badstuber leh Jerome Boateng te hian zaninah fimkhur taka an khelh a ngai dawn a ni.

Germany hian nikum November thla khan friendly match-ah Dutch ho hi 3-0 in an lo hneh tawh a, hei team inrintawkna a pe ang. An coach Joachim Low chuan, “Team pahnihte game plan hi a tha tawk em em a. Netherlands game plan hre mah ila anni pawhin Germany game hmang an hre ve tho va, chuvangin zanin inkhel turah hian theihtawp chhuah a ngai dawn a ni,” a ti.

Netherlands probable lineup: Stekelenburg, Van der Wiel, Heitinga, Mathijsen, Willems, N De Jong, Van Bommel, Robben, Sneijder, Afellay, Huntelaar.
Germany probable lineup: Neuer, Boateng, Hummels, Badstuber, Lahm, Khedira, Schweinsteiger, Muller, Ozil, Schurrle, Gomez.

Sawi duah tawh lovang, kan sawi buangbar mai mai! A hmuhnawm á¹­hin hle mai a, hetia ziah ai hian a hmuhnawm á¹­hin. Player beisei pha lo leh beisei aia á¹­ha te, team langsar tlak hlauhthawnawm leh result mak tak takte kan hmu ta nual a. Football nge nge a ropui e.

Poznan — Group C: Italy v Croatia (09:30PM)
Probable lineups:
Italy: Buffon, Bonucci, De Rossi, Chiellini, Maggio, T. Motta, Pirlo, Marchisio, G’rini, Balotelli, Cassano.
Croatia: Pletikosa, Srna, Corluka, Schildenfeld, Strinic, Rakitic, Vukojevic, Modric, Perisic
Jelavic, Mandzukic.

Italy khan an game hmasaa Spain an khelh khan an draw hram a nih kha. Mahse, world champion ni lai draw pha an ni a, Croatia an hneh ngei dawn em? Croatia hi point 3 hmu-a group leader ni mek an ni a, zanina point 3 an hmuh leh chuan an tlang chho tawh dawn a ni. Chu a nih avang chuan an theihtawpin Italy hi an fight dawn a, a hmuhnawm ang. Italy hi an chak lo a nih ngat chuan chance an nei chhe tawh hle ang.

Italian Di Natale hi kum 34 mi a ni mek a, game hmasa goal a thun khan he tournament history-a goal thuntu upa ber pawl a ni. Kum 2002 World Cup group stage khan team hnih hi an lo inkhel tawh a, Croatia hian 2-1 in an hneh a nih kha. Chuta an goalkeeper pahnihte chu tunah an inhmachhawn leh dawn a, Buffon tan tun baka phuba lakna hun á¹­ha a vang tawh kher ang. Team pahnihte hi Euro 2008 khan Quarter final-ah penalty hmanga hnawhchhuah ve ve an ni tih hre mai mai bawk ila.

Gdansk — Group C: Spain v Republic of Ireland (12:15AM)
Probable lineups:
Spain: Casillas, Arbeloa, Ramos, Pique, Alba, Busquets, Xabi Alonso, Silva, Xavi, Iniesta, Torres.
Rep. of Ireland: Given, O’Shea, Dunne, St Ledger, Ward, Duff, Andrews, Whelan, McGeady, Keane, Long.

Spain hi chak zawk tura rin kai chu an ni a, an tlang ngei pawh a rinawm. World no. 1 leh no. 18 inkhel tur ni mah se Republic of Ireland hi thih thain an á¹­ang dawn a, Spanish ho tan tha thlah a thiang lovang. Ireland hi an chak lo a nih chuan an tla vang vang tawh dawn a ni. Chutih rualin Spain hian an draw a nih chuan players nei á¹­ha em em si-a tlak a hlauhawm pha ve tho mai. Spain leh Ireland hi 2002 World Cup-ah khan lo inhmachhawnin an indraw tawh a, Spain kha penalty shootout hmangin an chak ta hram a nih kha. Ireland hi kum 1988-a Euro an khelh á¹­an hnua an game hmasa ber a ni ang.

Inkhel en nuam vek u…

Khua a hnima lung erawh a zing kher lo. Khua a mawi dawn lo tih hre reng chungin Civil Hospital bulah phur takin kan innghak khawm a, Dortor 3 leh nurse 5 hmel kan han hmuh meuh chuan misual 8 thla a muang kher mai. Dan pangngai angin hunbi tiam zing dar 9 chu darkar khar zeta kan pelhsawlh hnuin 17kms a hla Thuampui chu car 5-in kan pan a, khaw awmdan chiang lo avang chuan kan motor awm nem chu kan sit ru viau thung si.

Thuampui kan thlenga YMA hruaituten min lo dawngsawngin an High School lamah kan bungruate phur chung ngeiin kan then chho ta a. Hmunhma buatsaih fel a nih hnuah tanna hun tawite kan hmanga tawngtainaa bul tan a nih hnuin kan thil tum, hlawhtling ngei se ti a Pathian hnena inhlan chunga kan thlir Free Clinic ngei mai chu kan tan ta! YMA Day lawmna hun an hman mek avanga thalai lam rawn lang rih lo leh, aw nem lam aia nu leh pa, pitar putar leh naupang rawn lang khup khup avanga @saitawk leh @ lr_hlonchhing te beidawng hmel erawh kan hai der hram hram rih a, beiseina thui tak kan neih vang a ni ber e.

Damdawi a thlawna sem tur hi Rs 8000 man vel kan keng thla a, kan dortor leh nurse-ten an lo lakkhawm sample ilo kan keng teuh bawk a inralring tha tawka inngaiin kan thla a muang nawn leh a. Male nurse 1 leh female nurse 4 te hian thil tihdan phung an lo hriat than tawh avangin an zarah kan thla a muang nawn leh pek bawk a ni.

NURSE ho hi an va fakawm em! Hlim hmel an pu reng a, an viak a thain damdawi sem, malaria test, BP test, Zunthlum en, registration zawng zawng an buaipui nghal char char a, duli tiata lo en phuau mai loh chu tih tur dang kan hre ve hauh lo.

DOCTOR-te taimakzia hi fak mawlh mawlh sen pawh a ni lo. Darkar 5 dawn chawl lovin damlo an en char char a, an thiamna an pe chhuak mawlh mawlh a, mamawhtute tan malsawmna an vawrh darh chuai chuai reng mai a ni. An va han hlu tak em. Khumchiktheia hian a thiante mi fel pahnih Dr. Mami Chawngthu leh Dr. Hriatpuia te a rawn sawm chhuak a, an thawkrim narawh e.

KEINI MISUAL, a phawvuaka lo phur ve em em te kha chuan inentir tan a nih chiahin kan thiam a tawp ve nghal Kan tih theih ve ni a ngaih inentir tur lo koh bak kha chu kan chenna ngai loh ran vek a ni. Chuvangin kan tih theih tawk ti turin inla chang sang takin doctor lo kawngkhar vengtuah kan tang nghal a. A tangkaina pawh hre miah lo leh a lar zawkna a nih beiseiin lr_hlonchhing chuan dortor bengbur (stethoscope an ti emaw ni?) chu dam lo ko chungin rinawm takin a han awrh ve ngawt a.

Thuampui nulate laka tlaktlum a beisei vang a nih ka ring ber. Midang zawng chu kuva ei leh mei zuk a ni ringawt, pawimawh hmel deuh deuhva veiin thla kan la mawlh mawlh ringawt mai a ni. Male nurse tura kan ruat @Ruatruatapa lah chu a sasehah meuh chuan a ‘tuai thi nei thut’ tlawk tlawk ta ngawt a, tih theih dang a nei lo tih inhriain an deptt. fakna a chhawm thlak chu a sem a sem ve ta ngawt a ni.

Extension Training Centre (SIRD) leh DRDA ten Rs 10,000 leh 5000 = Rs 15,000 in min sponsor a, kan tan zawng a lawmawm thlawt, an tan erawh kan tangkai tam lo thung.

Chawhnu dar 2:45 vel khan mi 190 chiah enin kan duh tawk thawkhat ta. Ruah a sur reng a, keinin kan tih tur kan ti ve mawp mawp bawk a. Damdawi pawh Rs 7500 man vel kan sem zo thei a, Malaria PF vei 2 leh zunthlum pakhat hmuh chhuah a ni a, inentir dangdai deuhah chuan beng chhunga khuai lut Dr. Hriatpuian a lak chhuahsak hi a ni deuh awm e. Kan insensona leh dortor leh nurse-te tha man kha a sum zawng chuan chhut ila cheng tam man a ni ngei ang, mahse, malsawmna min petu tana tuisik no khat lek pawh kan nih ve theihna nia ngaiin kan insengso thei hi kan lawm takzet a ni.

Ruah sur bur bur karah kan haw chho va, Vanhne khua pelh hnuah leiminin min dang ta! A dul kiar leh kiar lo pawh chirh kai luaiin kan inhai hnuah hur hnuang chungin Circuit house-ah kan lut tlang ve ngawt a, chaw ei tur kan order vek tawh avangin kan inthlahrung chuang hauh lo. Puar hnep hnawpin kan ei a, hun danga tih leh ngei tumna nei khawpa a zawngchhangthlakzia inhrilh pahin kan haw ta mai.
(NOTE: Pics-te hi mobile cam-a lak a nih avangin a fiah tha tawk lo, min hrethiam mai teh u kei kisual hi)

Thingtlang Motor pawh luh phak lohna hmuna awm annih tlat avangin, College zawm tur pawh chuan nilenga ke a kal hnuah motor man theih tawk a ni a. A lo tihfo tawh avangin tun tum chu thlahtu mumal pawh neilovin amahin a thawkchhuak a. A khua a harin nisa vawl vawl avang chuan a thlan te a chhuak nasa a, a chauvin a tui a hal tawh kher mai. A hma lawkah chuan khua han tih tham pawh ni meuh lo; Leilet awmchilh a, bawng te pawh vulh nghal in 4/5 vel hi an awm a. Chu khua chu thlen theih hram tumin a han kal leh hram hram a, a tawp atawpah zawng a thleng ve ta hram a.
In lo awm hmasaberah chuan tleirawl chhuak deuh awrh nula biangtai tek mai hian zai rat rat pahin bawngchaw alo pe a. Chu mikhual tlangval chuan, hawihhawm takin tui in tur a han dil ta a. Chu tleirawl chuan chu tlangval chauh zia leh a thlanin a kawr a bual huh vek tawh dan a han hmuh chuan, thuhna tur a pe a, an kawta thingbuk daihlim hnuaiah chuan a thut chawlh tir a, inchhungah chuan a luhsan ta a.

Reiloteah chuan a lo chhuak leh a, no khat pam hian bawnghnute thianghlim tak mai chu a rawn keng a, chu tlangval chu a pe ta a. Chu tlangvalin chu bawnghnute a han in mai chu, tui a ti kher mai a, thawkpawh la mang lovin a in ta khawlh khawlh mai a ni. A hmelah chuan a la khamlo a ni tih a hriatin tleirawl chu inchhungah a zuk lut leh a, bawnghnute no khat pam dang a zuk la leh ta a, chu chu a han pe leh ta a. Chu tlangval chuan tui ti takin a lo in leh a, tunah chuan a chhawlhal pawh a reh ta raih mai a, tlangval thaza rual ani bawk a, a hah pawh alo dam fel leh ta bawk a, “Ka lawm e, ka lawm tak zet mai, ka chunga i thatna hi ka theihnghilh leh tawh ngai lovang” a ti a, khawpui lam pan chuan a kal leh ta a ni.

Hun leh ni te an ral zel a, chu tleirawl pawh chu, nula hmeltha taka lo ni ta a. Nimahsela, a nu chuan natna khirh tak mai alo nei ta tlat mai a. Chu chu namen lova a pum na thin chu a ni. Tichuan, a tawp a tawpah chuan khawpui lam pan an lo rel thlu ta a. a lehkha thiam ber leh a tlawngawl ber anih avang chuan chu nula chuan a hruai leh awmpui alo ngai ta a. Khawpuiah chuan Private damdawiin lian tak pakhatah hian an in admit ve ta a.

Chu damdawiinah chuan Test hrang hrangte an han tih zawh hnuah chuan a natna chu Chhul Cancer tantir ani tih hmuhchhuah ani ta a, ‘Chhul paih mai chu kawng awlsam leh tha ber anih thu pawh Doctor chuan a hrilh ta vek a ni. Tichuan, chu damdawiin neitu Doctor thiam tak mai chuan amah ngeiin zaiin a chhul chu paih alo nit a a, uluk taka damdawi tha tinreng nena hun engemaw chen enkawl anih hnuah chuan chu nu pawh chu alo dam fel ve leh ta a, damdawiin pawh an lo chhuahsan thei dawn ta a ni.

Amaherawhchu, an chhuah hmaiin, Damdawiina an awmna bill chu pek tlak fel phawt chu alo ngai dawn ta a. A tuk zingah chuan Envelope pakhat hi Nurse pakhat hian a rawn pe ta a, chu nula chuan envelope chu a han hawng ta a, a nu damdawiin awm bill chu alo ni reng mai a. A han chhiar thla ta a:-

(1) Test chi hrang hrang man – Rs. 25,000.00
(2) Damdawi man – Rs. 12,500.00
(3) Chaw man – Rs. 5,000.00
(4) Zai(operation) man – Rs. 20,000.00
(5) Nurse etc.service charge – Rs. 5,000.00
(6) Cabin fee – Rs. 15,000.00
Total – Rs. 82,500.00 (Cheng singriat sanghnih zanga)

Tih hi a lo inziak that mai le.

A thlanfim a rawn bawl ta tak tak mai a, a sa huam huam hian hian a inhria a. Kal man leh eng eng emaw manah an pawisa neihchhun tlemte an lo hmangzo deuh thaw tawh si. An tanah chutiang ang sum tam lutuk chu khawi atangin nge an hmuh/neih theih tak ang le? A rilru a hah ta kher mai.
Bill chu a han ennawn leh a, a hnuaiah chuan kutziak chhiar har ang reng tak hian Doctor note: hi alo inziak a; “Heng zawng zawng hi bawnghnute no hnihin a rul vek tawh” tih hi alo inziak a, Chu damdawiin neitu Doctor ngei mai chuan a seal chhu kalhin a hming alo sign hnan thlap hi alo ni a.
Awih mai ava han harsa dawn tak em! Chu nula chuan mak a tiin a ngaihna a hrelo kher mai. Nurse duty a han zawh fiah chuan, Doctor ngei chu an va ko ta a, Hmana Doctor a zir laia tuihal dangchara, chau hlum lo chauha a awm laia a chunga that chhuah a, an thil neih hlu ber mai, an sum hmuhna hnar bawnghnute no hnih a peka kha ani tih leh, Doctor thiam leh lar tak loni tain, amahin Damdawiin lian taka lo hawn tak thu te, kha a chunga a thiltih kha rulh let leh ngei a duh thu leh, hei hi a rulh let leh theih dan ni a a hriat thu chu a hrilh ta a ni.

Kan Bible chuan, “I chhang paih la tui chungah chuan, i hmu leh dawn si, ni rei hnuah. Chan tur pe la, mi pasarih, pariat hnenah, i hre si lo, lei chungah hian thil tha lo, lo tla tur chu” (Thuhriltu 11:1-2) tiin min hrilh a ni. Mite chunga a let leh tur ngaihtuah miah lova, khawngaihna leh thatna avanga thil kan pek hi, hun thalo kan chunga alo thlen hunah te kan chungah chiahpuam chungin alo let leh thei tlat a ni.

Kan Pa Pathian hian kan sual man bat zawng zawg hi, a Fapa hmangaih thiltih inpekna ropui avang khan a man pek tlak vekah alo ruat dim diam tawh a, keini zawng lawmthu sawi mai tur leh amah chauh chu faka, a tana rinawma, thuk lehzual zawka inpe mai tur kan lo ni e.

Synod Hospital Durtlang a Grace Home – HIV AIDS Hospice Medical Officer in charge Dr.Lalchhanhima Ralte chu 5th Asia Pacific Palliative Care Conference Singapore a 14 – 15 July 2012 a neih turah Grace Home chungchang a ziah chu present tura sawm niin India ram atangin ani chiah hi sawm ani. Hemi conference a Singapore President Dr.Tony Tan a ho a gala dinner neih turah pawh sawm tel ve leh niin lawm man hlan ani dawn nghe nghe a ni.

Palliative care hi Mizoram ah mai pawh ni lo, India ram angah pawh subject thar/concept thar ani a. Ram changkang zawkah chuan nasa taka kalpui ani a. A tawi zawngin a awmzia chu damlo benvawn – chronic diseases – end stage cancer, hiv aids etc, damdawi leh thil danga enkawlna leh vak awm tawh chuanglo, na lutuk leh hreawm lo thei ang bera hun tawp dawn lama awmtir ti ila a tawi zawngin.

Dr.Lalchhanhima Ralte hi HIV AIDS lama mi tui leh heng ang lama Mizoram ina kan mithiam chho zel tur ani a. International HIV conference ah te pawh kal fo tawh in. October 2012 a lo awm leh tur 19^th International Palliative Care Conference, Montreal, Canada ah pawh Singapore a a present tur tho hi present tura sawm leh ani bawk.

Hetiang  International platform a  Mizo thalai kan awm chho zel hi a lawmawmin, midang te tan pawh entawntlak tak niin, mahni hnathawhna field ah theuh hmasawn tura min fuih tu leh ti phur tu anih theih nan, Mizo tribal kephah hlai pawn kan thei ani kan tum chuan tih kha kan lo hriat nawn leh nan ka rawn post ani e.

“Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria” (Rom 8:28)

He bible chang hi a lar viau mai a, kan hre theuh awm e. Amaherawhchu, a thlamuan thlak viau lai hian, kan nuna han tawng chiah erawh hi chuan, Engti kawngin nge kan thatna tur anih theih ang? Tih hi hriatthiam erawh chu a har thin si a ni. Thawnthu awmsa ka hmang tam ta a, tun tum chu keima nuna ka tawng ngeite zinga pakhat chauh I han thai lang dawn teh ang.

Kum 2003 khan, Kan hotuten Itanagar dai North Eastern Regional Institute of Science and Technology(NERIST) awmna Nirjuli khhua a, daipawn deuhva Leilet hmun zau takah Sikul din turin min tir a; kan chhungkuain chhangchhe takin kan chhuk ve a ni. Kan Sikul dinna tur hi aram alo zau hle mai a, NERIST leh kawngpui sial thar inkar metres 350 vel zet mai, avang lam metres 150 vel lai azau hi alo ni a. Leilet hmun anih avangin, In leh Thingkung pakhat mah a awm lo. Chu aia la zau mah kawng leh a thlanga Lui pakhat inkar ram zau takah chuan In lian tak room pawh 6 zet nei, ding fal nalh mai chu kan luah a, kan thenawm hnai ber pawh mel chanve dawn laia hlaah an awm a ni.
Chutiang chuan theih ang angin hma kan han la ve tan ta a. Zankhat chu Ruah asur nasa hle mai a, Power supply pawh a awmlova, a thim mup ringawt mai a. Kei zan ruahsur hnuaia muttui thin tih takah ka mut a tui kher mai. Zing kan han tho ta a, kan choka hi inpui nena inkalpawhna a chung zarzawm siin, a hranpa nalha awm a ni a. Choka ka han hawng chu, kan Gas Cylynder, Stove leh Fridge a kan hman Automatic Stabilizer chu alo awm tareng reng lo mai hi alo ni a. Tala kha a inkalh tha thlap si a, amak kan ti hle. Mahse, kawngkhar pakhat zawk, a chhunglama kan kalh chu a chung chiaha Ventilator atanga zenin an lo hawng chu niin. A hrilhhai thlak duh kher mai. A ram neitu Naharlagun(kan awmna atanga km 7 vel a hla) a awm chuan an gas chu min hmanhawhtir a, chumi zing atan chuan eirawng kan bawl ta a.

Tichuan, chhunah chuan Gas set thar chu ka han lei leh ta a ni.(hetih lai hi chuan Gas ala harsa rihlo khawp mai). A in neitupa chuan, chu kawngkhar chu Brick-in a ping phui ta hmiah mai a, Assam ramri ahnaih em avangin misual (rukru) an tam thu leh, chutiang ang zan ruah sur bur bur leh Power supply awmloh zan chuan an chet thin thu min hrilh bawk a. Tichuan, chutiang zan alo thlen apiang chuan, Torchlight Cell 3 nen, Sairawkherh leh marble nen, Chem sei nen hian ka inring ru hle thin a, mahse, ka chang ru tih anhriat vang nge? An rawn che duh thin si lo.

Tukkhat erawhchu, zing kan han tho chu kan choka kawngkhar kalhna Tala chu alo chhia a, kan Gas bawk chu an lo ru leh a, chokaa kan dah kan chemsei chu an lo ru tel bawk a. mut hmain ruah a sur lova, tui taka kan mut hnuah a sur leh si a, Power supply pawh alo awmlo hi ani awm e. A thinur thlak thin kher mai. Chhunah Gas set dang chu kan han lei leh ta a ni.

Zankhat pawh, a ram netuin aram enkawl tura arawih Gogoi-a chu a te hlut mai a, kan Bathroom-ah mi an luh thu a sawi a(Kan bathroom leh Latrine hi pawnah a awm a) ava um a, a te chul mai a. a te danah chuan misualte chuan an lo khawih ni ngei hian alang a, Paijama leh mutkawr nen, slipper nen chuan chemsei humchhuakin ka va um ve a; Ka thinur tawngkhawng tawh nen, kan Chowkider pa chu chhan tlaklohvin an lo hliam palh ang tih ka hlauthawng nen chuan ka han au tial tak tak mai anih kha. Ka au thawm a rapthlak bawk a, thenawm hla tak taka mite pawh “Eng thil nge nita?” tiin an rawn au ve a. Mahse, eng em chu alo ti lem lo va, misual ho pawh chu ka va hmu hman ta chuang lem hlei lo va. Ina ka han lut leh chu, ka inhrosa thawm kha a rapthlak em mai a, ka thiannu hlauh nei pawha ka hriatloh pawh, a thauvah alo man a, alo khur chhe nasa mai hi alo nia.Kan ram netupa chuan, khatihlaia Kan Chowkider pa Gogoi-a ruk vek anih thu tun hnuah min hrilh a, Uipa lian tak kha an nei a, a bauh ngai miahloh avang khan, a dik pawh a dik mai thei.

Kawngchhak lama Kan Sikul tur kan peihfel hnuah kan insuan chho ta a, Fencing te atha ta bawk a, Tin, mi kan lo awm ve dih diah ta a, thil chu abo ta ngai meuh lo. Amaherawhchu, Tumkhat chu Hostel Chokaa Kan Gas set bawk chu an ru leh a ni.

Gas an ruk hian a Card an ruk tel ngailoh avangin, Gas Card chu kan ngah ta hle mai a. Sikul kan nih avangin, Customer tha kanni a, Doimukh (kan awmna atanga km 2 vel ahla) a Gas agent thar te pawh chuan, Card lo hian min pe mai thin a, Naharlagun lama kan rawngbawlpuite pawh kan kep vek zawk thin a ni.

Amaherawhchu, tunhnaia Gas harsatna hian Arunachal a rawn thleng ve ta tlat mai a. Sawrkar lam an tang a, Gas harsatna bul pakhat chu, Agent ten, Hotel, Restaurant leh Sikul hostel hote Card tellova an pek thin vang ani tih an hriat avangin, card lova lak an phal ta miahlo mai a, a buaithlak ta hle a ni. Vanneihthlak takin, kan Gas bo thin avang khan Gas Card kan lo kawl teuh; Thingrem mawnga kan dah tawl mai mai kha, an lo tangkai ta hle mai a. Khatiang khan kan Gas kha lo bo thinlo sela chuan, tun hunah hian kan va han harsa dawn tehreng em. Hostel kan run thei kher lovang le. A hunlaia hrilhhai thlak em em leh thin tiur em em mai kha, kan thatna tur alo ni reng mai le.

Tin, Mizoram state ralmuang takah kan cheng thin a, mi ramah, mi chitin-chitang inpawlhsawp na hmunah fimkhur atul zia kan hriat phah bawk a ni. Tunah chuan, Kan hostel chokaah pawh Cook tlangval pakhat leh Chowkider te kan riahtir ta ziah a, Kan inluah thar pawh security lam kan ngaipawimawh a, a him ta ang reng hle a ni. Kan hmuh phakloh hi Lalpa Pathian hian alo hmu khiau mai a, kan inven thiamlohna laiah hian inven fimkhur angaih zia hi min lo zirtir thin a lo ni reng mai.

Pathian hmangaihtu, amaha ruat anga a kohvate tan hian, an thatna tuin engkimin a lo thawhsak thin tehmeuh mai a lo ni.

Sunday chibai vek u le.

July ni 15, 2012 zan dar 8-11 khan Rokunga thih champha (July 12) denchhanin, Indiana (USA) Rokunga Zan Huaihawtute bultumin Chin Center, Indianapolis-ah Rokunga Zan urhsun taka hman a ni a, a tui mi mi 40 vel an kal khawm.

Rokunga Zan hi Pu Hualsailovaâ€n a kaihruai a, Rokunga Zan buatsaih chungchang leh Rokunga chawimawi chungchang thukhawchang a sawi.

Pu R. Lalchungnungaâ€n tingtang tumin hla a hruai a, Rokunga hla hmangin an inpawlho a, an hlim tlang hle. Pathian hnenah Rokunga Zan hlanin Dr. Muansanga  a tawngtai a, Zofate tana Rokunga min pek avangin lawmthu a sawi.

Pu Zonunmawia Thlaute hnen atangin ‘Hnam nunphung leh ziarang humhalha hmalak a pawimawh thu†ngaihthlak a ni. Tamil-ho leh Japanese-ho USA rama an pem luh dan, an nunphung leh ziarang humhalh tuma tan an lo lak nasat dan leh chuti chung pawha chhuan hnihna vela thangtharten an tawng leh nunphung an hloh tho thu sawiin, USA-a Mizote inhumhalh zel dan turah ngaihtuahna tam tak a neihtir.

Mizo Society of America, Indiana President Dr. Rodinga thukhawchang ngaihthlak a ni a. Rokunga a ngaihsanawmzia, Mizona tihvul zel kawnga Rokunga hlate pawimawhzia, Rokunga hi chawimawi tlak a nihzia leh chawimawi phute chawimawi kawnga tan lak zel a tulzia a sawi.

Pu Van Lal Pek Tharaâ€n huaihawtute buatsaih Rokunga chanchin tawi a chhiar chhuak. Rokunga chu rethei tak chunga tumruh leh tuarchhel taka zirna run bel tang tang mi a nihna, mi ngilnei tak a nihna leh hla phuahtu nungchang tha a nihna te tarlangin, a hla mai ni lo – a nun hrim hrim pawh a ngaihsanawm zia leh entawn tlakzia sawiin a tawp a khar.

Lalchhanhimaâ€n ‘Rokunga hla-in Mizo khawvel a nghawng dan†chanchin ngaihnawm takin a sawi a. “Rokunga hi Mizo zinga hla phuah thiam ber leh hla phuah tam ber a ni hauh lo. Mahse Mizo hnam chawimawitu, Mizo hnam englai maha hmuhsit leh dahhniam phal ngai lotu, hun danglam zel karah pawh Mizo nih hlutna leh chhuanawmna vawngnung reng tura thuchah nung kengtu ropui Rokunga hminga he ZAN buatsaih a lo ni hi a ropui a, chutiang buatsaih duh leh hlut duh thinglung pu mi heti zat kan awm hi a ropui a ni” tih thuhma sawiin, Rokunga hlain khawvelin hmun hrang hranga Mizote a nghawng zel dan a chhuipui. “Kum 1944 khan Rokunga chuan Zofate chenna tlangram chu hnam mawl chapo ringawtho awm khawmna mai ni lo a, hnam dangte khuma hmasawnna-in a tuam vel Zoram nuam ni turin ‘Raltiang I Kai Ve Ang’ tih hla hmangin, beiseina zawng zawng nen, ban pha chiah lo chungin a lo au lawm lawm a. Vawiinah hian keini America Mizote hi khawvel leilung inrelbawl dan atanga thlira raltiang ram, khawvel ram hmasawn ber anga sawi thin ramah ngei kan cheng a. Chutih rual chuan kum 65 liam taa Rokunga lo thlir ‘Raltiang Ram†chu kan kai tawh chiah em? tih i ngaihtuah nawn ang u. Hawh u, Mizote hi Mizo takin, lungrualna, rinawmna, dikna, huaisenna leh tlawmngaihna nen hmasawnna lam pan zel ila, he ramah ngei hian Zoram Thar dinin Chhawlpial Run rem ila, Rokunga Raltiang ram chu kan nunah i thlentir ang u.” tih thuchah leh chona hmangin a thusawi a titawp.

Pu Vanlalrawnaâ€n ‘Mizo Thu leh Hla humhalha tichangtlung pawl neih a pawimawhna leh hmalakna thenkhat†sawiin Mizo Thu leh Hla humhalh pawl din rawtna siamin, kal khawm mipuite hnen atangin ngaih dan a la khawm. Kal khawm mipuiten an phurpui hle.

Tv. Noel Lalthanglianaâ€n Mizo Hlakungpui Mual chanchin tawi sawiin Mizo Hlakungpui Mual tan kal khawmten mahni remchan ang tawk te te sumpai an thawh khawm.

Kal khawm mipuite hnen atanga duh duh sawi hun hawn a ni a, Tv. Noel Liantea leh Pu Vana Chawnghlut te ding chhuakin Mizo Hnam humhalh kawnga an hmuh dan an sawi.

Tv. C. Thangributa hnen atangin lawmthu sawina ngaihthlak a ni a, Rev. Lalthuamluaia malsawmna-in Rokunga Zan chu tihtawp a ni.

Rokunga Zanah hian huaihawttute buatsaih Rokunga chanchin tawi ziahna lehkhaphek sem a ni a, tin, Rokunga hla hmuh theih ang ang leh hnam hla thenkhat dah khawmna Car-a play tur audio CD sem a ni bawk.